OMM Redaksiyası
Avropa liderləri Arktikanın təhlükəsizliyi və əməkdaşlıq məsələlərinə həsr olunan yüksək səviyyəli sammit üçün Finlandiyanın Rovaniemi şəhərində bir araya gəliblər.
İqlim dəyişikliyinin Arktikanı dəyişdirdiyi bir vaxtda görüşlərdə artan geosiyasi rəqabət, yeni gəmiçilik marşrutları və təbii ehtiyatlara çıxış müzakirə olunur.
Finlandiyanın Baş naziri Petteri Orpo Avropanın Arktikada baş verən prosesləri daha aydın dərk etməli və onlara cavab vermək üçün əlaqələndirilmiş strategiya hazırlamalı olduğunu bildirib.
“İlk növbədə deməliyəm ki, Arktika rifahımız və təhlükəsizliyimiz üçün çox vacibdir”, – Petteri Orpo deyib.
O qeyd edib ki, Avropa İttifaqı regiondakı mövqeyini necə gücləndirə biləcəyini müəyyənləşdirməlidir.
Petteri Orpo Arktikanın təbii ehtiyatlarını və iqlim dəyişikliyi ilə əlaqədar yeni dəniz yollarının yaranmasını xüsusi vurğulayıb. Onun sözlərinə görə, bu marşrutlar regionun iqtisadi və strateji əhəmiyyətini artırmaqla yanaşı, çıxış və təsir uğrunda rəqabəti də gücləndirir.
“Təbii ehtiyatlarımız var. İqlim dəyişikliyi səbəbindən yeni dəniz yollarımız yaranır”, – Finlandiyanın Baş naziri bildirib.
Finlandiya hökumətinin başçısı Arktikada təhlükəsizlik təhdidlərinin artdığı barədə də xəbərdarlıq edib və konkret addımların atılmasının vacibliyini vurğulayıb.
Sammitdə Avropa ölkələrinin Arktikada əməkdaşlığı dərinləşdirməsi, eləcə də təhlükəsizlik və iqtisadi maraqlara daha əlaqələndirilmiş yanaşmanın hazırlanması məsələlərinin nəzərdən keçirilməsi gözlənilir.
