Dövlət Şəhərsalma və Arxitektura Komitəsinin sədri Anar Quliyev Birləşmiş Millətlər Təşkilatının Ümumdünya Şəhərsalma Forumunun 13-cü sessiyasının (WUF13) bağlanışına həsr olunmuş mətbuat konfransında çıxış edib. O, son günlərin şəhərsalma sahəsi üçün əhəmiyyətini vurğulayaraq, Azərbaycanın inklüziv şəhərsalma istiqamətindəki fəaliyyətini dünya gündəmi ilə uzlaşdırmağa çalışdıqlarını bildirib.
Anar Quliyev BMT Məskunlaşma Proqramı ilə əməkdaşlığın önəmini qeyd edərək, forumun statistik göstəricilərinə diqqət çəkib:
- Tədbirdə 58 mindən çox iştirakçı qeydə alınıb.
- Müxtəlif ölkələrdən 400-dən çox spiker çıxış edib.
Komitə sədri forumun gələcək əməkdaşlıqlar üçün yeni bir təməl yaratdığını və icmaların dayanıqlı inkişafdakı rolunun xüsusi əhəmiyyət daşıdığını vurğulayıb. O, həmçinin Azərbaycanın işğaldan azad edilmiş ərazilərində icra olunan genişmiqyaslı bərpa işləri, milli potensialın artırılması və "ağıllı kənd" kimi innovativ layihələrin bu prosesdəki yerinə toxunub.
