"American Airlines" aviaşirkəti tənzimləyici qurumların icazəsi və təhlükəsizlik qiymətləndirmələri başa çatdıqdan sonra Venesuelaya gündəlik xidməti bərpa etməyi planlaşdırdığını bəyan edib.
"Operativ Məlumat Mərkəzi-OMM" xəbər verir ki, bu addım ABŞ-nin Nikolas Maduronu hakimiyyətdən uzaqlaşdıran hərbi əməliyyatından cəmi bir neçə həftə sonraya təsadüf edir.
ABŞ Prezidenti Donald Tramp ölkənin müvəqqəti prezidenti Delsi Rodriqes ilə apardığı müzakirələrdən sonra Nəqliyyat Departamentinə birbaşa uçuşlara qoyulan uzunmüddətli məhdudiyyətləri aradan qaldırmağı tapşırıb. Dövlət başçısı amerikalıların yaxın vaxtlarda Venesuelaya təhlükəsiz şəkildə səyahət edə biləcəklərini vurğulayıb.
Xatırladaq ki, "American Airlines" 2019-cu ildə ABŞ-nin qadağasından sonra Venesuela marşrutlarını dayandırmışdı. Şirkət rəsmiləri bildiriblər ki, xidmətin bərpası biznes, istirahət və humanitar məqsədli səfərlər üçün yeni kanallar açacaq. Lakin uçuşların başlaması üçün Federal Aviasiya Administrasiyasının (FAA) təhlükəsizlik yoxlamaları bir neçə ay davam edə bilər.
