Afət Ziyadqızı
Avropa İttifaqı (Aİ) Qəzzada bərpa işlərini sürətləndirmək məqsədilə yeni təşəbbüsə start verib.
“Operativ Məlumat Mərkəzi-OMM” xəbər verir ki, Aİ Komissiyasının yaydığı rəsmi açıqlamaya əsasən, Brüsseldə keçirilən Fələstin Donorlar Qrupunun ikinci toplantısı çərçivəsində “Qəzza Komandası Təşəbbüsü” təqdim olunub.
Bildirilib ki, layihənin əsas məqsədi Qəzzada dağıdılmış infrastrukturun və həyati əhəmiyyət daşıyan xidmətlərin qısa müddətdə bərpasına dəstək göstərməkdir.
Məlumata görə, proqram çərçivəsində su və kanalizasiya sistemlərinin təmiri, dağıntıların və bərk tullantıların təmizlənməsi, səhiyyə xidmətlərinin yenidən fəaliyyətə başlaması, həmçinin enerji, kənd təsərrüfatı və ərzaq təminatı sahələrinin bərpası istiqamətində işlər görüləcək.
Qeyd olunub ki, təşəbbüs Aİ, Birləşmiş Millətlər Təşkilatı (BMT) və Dünya Bankının aprel ayında dərc etdiyi “Qəzza üçün Sürətli Zərər və Ehtiyacların Qiymətləndirilməsi” hesabatı əsasında hazırlanıb.
Açıqlamaya əsasən, “Qəzza Komandası Təşəbbüsü” çərçivəsində erkən bərpa işlərinin maliyyələşdirilməsi üçün ümumilikdə 883,6 milyon avro həcmində vəsait səfərbər edilib.
Bununla yanaşı, Fələstin rəhbərliyinə maliyyə yardımının çatdırılması mexanizmi çərçivəsində yeni əməkdaşlıq və maliyyə töhfələrinə dair müqavilələrin də imzalandığı bildirilib.
