OMM Redaksiyası
Azərbaycanın 21 yaşadək futbolçulardan ibarət millisinin hücumçusu Ağadadaş Salyanski Avropa çempionatının seçmə mərhələsində Şotlandiyaya qarşı keçirəcəkləri oyun barədə danışıb.
22 yaşlı forvard rəqibin güclü komanda olduğunu qeyd edib. O, Azərbaycan millisinin görüşə ciddi hazırlaşdığını və Şotlandiyanın güclü və zəif tərəflərini təhlil etdiyini bildirib.
“Şotlandiya ilə oyun asan olmayacaq. Xüsusilə belə ağır səfər qarşılaşması çox çətin keçəcək. Sabahkı oyunda xal və ya xallar qazanmaq üçün əlimizdən gələni edəcəyik. Ölkəmizi layiqincə təmsil etməyə çalışacağıq”, – deyə Salyanski söyləyib.
Futbolçu hazırkı heyətdə yer alan oyunçuların əksəriyyətinin Premyer Liqada çıxış etdiyini vurğulayıb. Onun sözlərinə görə, müntəzəm oyun praktikası belə matçlarda komandaya kömək edir.
Azərbaycanın U-21 millisi Şotlandiya ilə görüşdən sonra oktyabrın 6-da Bakıda Cəbəllütariqlə qarşılaşacaq. Salyanski bu oyunda yalnız qələbə barədə düşündüklərini deyib.
Hücumçu əsas milliyə dəvət almaq arzusunu da ifadə edib. O, icarə əsasında çıxış etdiyi “Araz-Naxçıvan”a qayıtdıqdan sonra özünü yaxşı tərəfdən göstərməyə çalışacağını bildirib.
Şotlandiya – Azərbaycan matçı sentyabrın 30-da Kilmarnokdakı “Ruqbi Park” stadionunda keçiriləcək. Qarşılaşma Bakı vaxtı ilə saat 22:30-da başlayacaq. Azərbaycan səkkiz oyundan sonra 7 xalla qrupda beşinci pillədədir.
