ABŞ və Venesuela hərbi əməkdaşlığı dərinləşdirmək barədə razılığa gəlib. ABŞ-ın müdafiə naziri Pit Heqseth çərşənbə günü Karakasa səfəri zamanı bunu açıqlayıb.
AnewZ-in məlumatına görə, bu, ABŞ xüsusi təyinatlılarının yanvarda keçirdiyi əməliyyat nəticəsində prezident Nikolas Maduronu hakimiyyətdən uzaqlaşdırmasından sonra Heqsethin Venesuelaya ilk səfəridir.
Venesuelanın müvəqqəti prezidenti Delcy Rodrigeslə birlikdə çıxış edən Heqseth razılaşmanın birgə təlimləri, kəşfiyyat məlumatlarının paylaşılmasını və hərbi əməkdaşlığın digər sahələrini əhatə etdiyini deyib.
Rodriges razılaşmanın tərəflərə “ümumi təhdidlər”lə mübarizədə kömək edəcəyini və Venesuela Silahlı Qüvvələrinin hazırlığını gücləndirəcəyini bildirib. Tərəflər əlavə təfərrüat açıqlamayıblar.
Səfər Vaşinqtonun Venesuelada, xüsusilə neft sektorunda artan təsirini vurğulayır. Maduro hakimiyyətdən uzaqlaşdırıldıqdan sonra ABŞ rəsmiləri ölkənin gələcəyinə, xüsusən enerji siyasəti və investisiyalara təsir göstərmək üçün sürətlə addımlar atıblar.
Bu təsir avqustda ABŞ hökuməti ilə tərəfdaşlıq çərçivəsində neft hasilatçısı “North American Blue Energy Partners”ə (NABEP) 17 neft yatağına uzunmüddətli çıxış imkanı verən razılaşma ilə xeyli artıb. Həmin yataqlarda Venesuelanın neft ehtiyatlarının təxminən beşdə biri yerləşir.
Razılaşmaya əsasən, ABŞ NABEP-in ana şirkətində 35 faizlik pay, hasilatın zəmanətli hissəsi və qalan hasilatı almaqda üstünlük hüququ əldə edib.
NABEP-ə nəzarət edən və razılaşmada mühüm rol oynayan venesuelalı iş adamı Alehandro Betankur çərşənbə günü prezident sarayında və ABŞ-ın səfirliyində olub.
Betankur jurnalistlərə Hegsethlə neft sahəsində əməkdaşlığın gedişatını müzakirə etdiyini deyib. Onun sözlərinə görə, NABEP ilin sonunadək gündəlik hasilatı 250 min bareldən çoxa çatdırmağı planlaşdırır və 10 quyu qrupunu istismara verməyə hazırlaşır. Şirkətin məlumatına görə, oktyabrın ortalarında gündəlik hasilat 224 min barel olub.
NABEP-in nümayəndəsi şərh sorğusuna dərhal cavab verməyib.
Heqsethin növbəti səfəri Kolumbiyaya olacaq
Heqsethin çərşənbə günü hərbi avadanlıq təhvil vermək və təhlükəsizlik sahəsində əməkdaşlığı müzakirə etmək üçün Kolumbiyaya da səfər etməsi gözlənilirdi.
Kolumbiyanın müdafiə naziri bildirib ki, Heqseth “Lockheed Martin C-130 Hercules” təyyarəsini təhvil verəcək, həmçinin ABŞ-ın Boqotanın narkotik qaçaqmalçılığı ilə məşğul olan qruplara və digər qanunsuz silahlı dəstələrə qarşı mübarizəsinə dəstəyini müzakirə edəcək.