ABŞ-nin Azərbaycandakı səfirliyi Anım Günü (Memorial Day) ilə bağlı fəaliyyətinə fasilə verib. Səfirlikdən verilən məlumata görə, bu gün nümayəndəlik vətəndaşlara xidmət göstərməyəcək.
Qeyd olunub ki, Anım Günü ABŞ Silahlı Qüvvələrində xidmət zamanı həyatını itirmiş şəxslərin xatirəsinin anıldığı əlamətdar bir gündür. Səfirliyin paylaşımında bildirilir: "Hər il amerikalılar Anım Günündə (Memorial Day) ABŞ Silahlı Qüvvələrində xidmət keçərkən həyatını qurban vermiş qəhrəman qadın və kişiləri ehtiramla yad edirlər. Amerika müstəqilliyinin 250 illiyini qeyd etdiyi bir dövrdə biz azadlıq, sülh və bizi birləşdirən dəyərlər uğrunda canından keçən insanları minnətdarlıqla xatırlayırıq. Onların fədakarlığı heç vaxt unudulmayacaq".
Xatırladaq ki, ABŞ-də may ayının son bazar ertəsi qeyd olunan bu bayram ənənəvi olaraq müxtəlif tədbirlərlə müşayiət olunur:
- Qəbiristanlıqların və abidələrin ziyarət edilməsi;
- Ailəvi toplaşmaların təşkili;
- Hərbi heyət və veteran təşkilatlarının iştirakı ilə paradların keçirilməsi.
Səfirliyin məlumatına əsasən, qurum mayın 25-i, bazar ertəsi günü bağlı olacaq.
