OMM Redaksiyası
"Yəməndə gedən döyüşlərdən xilas olmaq üçün ölkəni tərk edən 2 mindən çox insan Qırmızı dənizi keçərək Şərqi Afrikada yerləşən Cibutiyə çatıb".
"Operativ Məlumat Mərkəzi-OMM" xəbər verir ki, bu sözləri Cibutinin iqtisadiyyat və maliyyə naziri İlya Musa Davaleh deyib.
"Cibutiyə 2084-dən çox qaçqın gəlib. Humanitar yardım göstərməyə sarsılmaz sadiqliyimizə baxmayaraq, ölkəmiz üçün vəziyyət daha da mürəkkəbləşir", - nazir qeyd edib.
Beynəlxalq Miqrasiya Təşkilatının məlumatına görə, Yəməndə döyüşlərin intensivləşməsi səbəbindən sentyabr ayında 82 min insan evlərini tərk etmək məcburiyyətində qalıb.
Yəməndə münaqişə 2014-cü ildə başlayıb. 2022-ci ildən etibarən ölkədə nisbi sakitlik müşahidə olunurdu. Lakin 2026-cı ilin iyul ayının əvvəlindən hökumət qüvvələri ilə husilər arasında döyüşlər ölkənin müxtəlif bölgələrində yenidən intensivləşib. Ötən həftə husilər hücuma keçərək Yəmənin Qırmızı dəniz sahillərinin bütün hissəsinə, eləcə də Bab əl-Məndəb boğazına bitişik ərazilərə nəzarəti ələ keçiriblər.
