İsrailin müdafiə naziri İsrael Katz Qəzza şəhərinin ələ keçirilməsi planını təsdiqləyib.
"Operativ Məlumat Mərkəzi-OMM" "Kan" xəbər agentliyinə istinadən xəbər verir ki, əməliyyat “Gideonun arabaları 2” adlanır.
“Əməliyyatdan sonra Qəzza şəhəri öz görkəmini dəyişəcək və daha əvvəlki kimi görünməyəcək”, – deyə Katz bildirib.
Yaxın günlərdə İsrail Müdafiə Qüvvələrinin (İDF) ehtiyat hissələrinin əlavə səfərbər edilməsi barədə açıqlama gözlənilir.
Bundan əvvəl mətbuatda yayılan xəbərlərə görə, İsrail hərbçiləri razılaşdırılmış nöqtələrə qədər geri çəkilərsə, HƏMAS döyüşçülərini Qəzzadan çıxarmağa hazır olduğunu bildirib. İsrail isə yalnız bütün girovların eyni vaxtda azad edilməsi və hərəkatın tam tərksilah olunması şərti ilə sazişə razılıq verəcəyini açıqlayıb.
Eyni zamanda jurnalistlərin məlumatına görə, HƏMAS avqustun 18-nə keçən gecə Misir və Qətər vasitəçilərinin təqdim etdiyi 60 günlük atəşkəs təklifini qəbul edib. İki aylıq fasilənin münaqişənin tam başa çatması üçün əsas ola biləcəyi qeyd olunur.
