Almaniyada iqlim fəalları Frankfurt hava limanında etiraz aksiyası keçiriblər.
"Operativ Məlumat Mərkəzi-OMM"-in xəbərinə görə, aksiya nəticəsində 50 reys təxirə salınıb.
Polisin etirazçılara müdaxiləsindən sonra hava hərəkəti gecikmə ilə bərpa edilib.
Hava limanının sözçüsünün sözlərinə görə etirazçılar neft, qaz və kömür çıxarmaq və istifadə etməyə davam etməyin insan həyatı üçün təhlükəli olduğunu bildirib. Onlar 2030-cu ilə qədər qalıq yanacaqlardan istifadəsini dayandırmağı tələb edib.
Qeyd edək ki, iqlim fəalları ötən gün həmçinin Köln-Bonn hava limanında hava nəqliyyatını təxminən 3 saat iflic edib.
İki gündür davam edən etiraz aksiyalarına görə polisin bütün hava limanlarında təhlükəsizliyi artırmağa qərar verdiyi öyrənilib.
