Zaporojye Atom Elektrik Stansiyası ətrafında növbəti müvəqqəti atəşkəs qüvvəyə minib.
“Operativ Məlumat Mərkəzi-OMM” xəbər verir ki, bu barədə Beynəlxalq Atom Enerjisi Agentliyinin (BAEA) yaydığı bəyanatda bildirilib.
Məlumata görə, BAEA-nın baş direktoru Rafael Qrossinin vasitəçiliyi ilə əldə olunan atəşkəs iyunun 5-dən qüvvəyə minib. Bu, 2025-ci ilin sonlarından bəri stansiya ətrafında elan edilən altıncı müvəqqəti atəşkəs hesab olunur.
Qeyd olunub ki, atəşkəsin əsas məqsədi nüvə qəzası riskinin qarşısını almaq üçün həyati əhəmiyyət daşıyan elektrik xətlərinin təmirinə şərait yaratmaqdır.
Bəyanatda Rafael Qrossinin sözlərinə yer verilib. O bildirib ki, BAEA insanları və ətraf mühiti mümkün nüvə qəzasının nəticələrindən qorumaq üçün bütün imkanlardan istifadə etməyə davam edəcək.
Xatırladaq ki, Zaporojye Atom Elektrik Stansiyası Dnepr çayının sol sahilində, Enerqodar şəhəri yaxınlığında yerləşir. Stansiya 2022-ci ilin oktyabrından Rusiyanın nəzarəti altındadır. Enerji bloklarında istehsal həmin ilin sentyabrında dayandırılıb və 2024-cü ilin aprel ayından etibarən bütün bloklar soyuq söndürmə rejimində saxlanılır.
