Bu gündən etibarən ölkənin idarəetmə sahəsindəki ən nüfuzlu layihələrindən olan VI "Yüksəliş" müsabiqəsinin qeydiyyat mərhələsinə rəsmən start verilib.
“Operativ Məlumat Mərkəzi-OMM” xəbər verir ki, bu barədə müsabiqənin İşçi Qrupunun rəhbəri Fərhad Hacıyev keçirilən brifinqdə məlumat verib. Onun sözlərinə görə, ötən beş il ərzində layihə həm iştirakçı sayı, həm də keyfiyyət göstəriciləri üzrə ciddi irəliləyiş əldə edərək, minlərlə namizəd üçün obyektiv inkişaf mühiti formalaşdırıb.
Builki müsabiqə üçün qeydiyyat aprelin 16-na kimi davam edəcək. Müraciətlər müsabiqənin rəsmi internet resursu olan "yukselish.az" vasitəsilə qəbul edilir.
Qeydiyyat mərhələsi bitənədək müsabiqəyə aşağıdakı tələblərə cavab verən şəxslər qoşula bilər:
- Yaşı 21-dən 51-dək olanlar;
- Ali təhsilli şəxslər;
- Ən az 2 il idarəetmə təcrübəsinə malik olanlar;
- Azərbaycan vətəndaşları.
"Yüksəliş" müsabiqəsi qeydiyyat, ümumi biliklər imtahanı, analitik təhlil, idarəetmə bacarıqları, yarımfinal və final olmaqla, ümumilikdə 6 mərhələdən ibarətdir. İştirak etmək istəyən namizədlər rəsmi saytda şəxsi kabinet yaratmaqla qeydiyyat formasını doldura bilərlər.
Xatırladaq ki, layihə Azərbaycan Prezidenti İlham Əliyevin 26 iyul 2019-cu il tarixli Sərəncamı ilə təsis olunub. Müsabiqə qalibləri mentorlar tərəfindən birillik fərdi inkişaf planı və 20 min manat məbləğində pul mükafatı əldə edirlər.
