Afət Ziyadqızı
Yəmənin tarixi liman şəhəri Mochada Husilər tərəfindən həyata keçirildiyi bildirilən hücum nəticəsində azı 7 nəfər həyatını itirib, 30 nəfər isə yaralanıb.
“Operativ Məlumat Mərkəzi – OMM” xəbər verir ki, hərbi mənbələrin məlumatına görə, hücum zamanı hava hücumundan müdafiə sistemləri 11 Husi dronunu zərərsizləşdirib.
Hadisə fonunda ABŞ Yəmənə dəstəyini bir daha təsdiqləyib. ABŞ-nin Yəməndəki müvəqqəti işlər vəkili Nil Hop Yəmən Prezident Rəhbərlik Şurasının sədri Rəşad əl-Alimi ilə görüşündə dəniz təhlükəsizliyi və terrorla mübarizənin əsas prioritetlər olduğunu bildirib.
ABŞ səfirliyinin açıqlamasında Vaşinqtonun “İranın dəstəklədiyi Husi təcavüzü” ilə mübarizədə Yəmənlə əməkdaşlığa sadiq qaldığı vurğulanıb.
Bununla yanaşı, İran və ABŞ arasında gərginlik də davam edir. ABŞ Prezidenti Donald Tramp Vaşinqtonun İranla “qismən danışıqlar” apardığını açıqlasa da, İranın xarici işlər naziri Abbas Əraqçi birbaşa danışıqların aparılmadığını bildirib.
Əraqçi həmçinin “Hörmüz boğazı”nın Tehranın irəli sürdüyü şərtlər yerinə yetirilənədək bağlı qalacağını bəyan edib.
Qeyd edək ki, boğazın bağlı qalması qlobal enerji bazarında da narahatlıq yaradıb. “Brent” markalı neftin qiyməti 1,09 faiz artaraq 84,46 dollara yüksəlib. ABŞ-nin BMT-dəki səfiri Mayk Uolts isə iqtisadi təzyiqlərin Tehranı güzəştə getməyə məcbur edəcəyini bildirib.
