Yaponiyada 72 yaşlı Cənubi Koreya vətəndaşı 33 il ölkədə qanunsuz yaşadığı üçün saxlanılıb.
“Operativ Məlumat Mərkəzi – OMM” xəbər verir ki, Şizuoka prefekturasının polis əməkdaşları tərəfindən saxlanılan şəxsin 1993-cü ildə Yaponiyaya 15 günlük turist vizası ilə daxil olduğu və həmin vaxtdan ölkəni tərk etmədiyi müəyyənləşdirilib.
İlkin araşdırma zamanı məlum olub ki, 72 yaşlı şəxs Yaponiyaya daxil olarkən qardaşına məxsus pasportdan istifadə edib. O, polisə verdiyi ifadədə daha yüksək maaşlı iş tapmaq ümidi ilə Yaponiyaya gəldiyini bildirib və törətdiyi əməli etiraf edib.
Məsələ ilə bağlı hüquqi araşdırma davam edir. Yaponiyada 2000-ci ildə yenilənmiş miqrasiya qanunları qüvvəyə minənədək viza müddətinin aşılması cinayət məsuliyyəti yaratmırdı. Hazırda isə həmin şəxsin viza müddətini ümumilikdə 33 il aşması və saxta sənəddən istifadə etməsi ciddi hüquqi nəticələrə səbəb ola bilər.
Saxlanılan şəxsin qanunsuz miqrasiya və pasportdan qanunsuz istifadə ilə bağlı məsuliyyətə cəlb olunması məsələsinə istintaq çərçivəsində hüquqi qiymət veriləcək.
