Afət Ziyadqızı
Cənubi Koreya, Yaponiya və ABŞ Şimali Koreyanın raket və nüvə təhdidlərinə qarşı sentyabrın 9-dan 11-dək birgə hərbi təlimlər keçirəcək.
“Operativ Məlumat Mərkəzi – OMM” xəbər verir ki, Seulun məlumatına görə, üç ölkənin iştirakı ilə keçiriləcək təlimlər regionda təhlükəsizlik vəziyyətinin gərginləşdiyi bir vaxtda təşkil olunur.
Cənubi Koreyanın Milli Təhlükəsizlik üzrə müşaviri Vi Sunq-lak ABŞ Prezidenti Donald Trampın Şimali Koreya ilə dialoqu bərpa etmək cəhdlərini dəstəklədiklərini bildirib. Bununla yanaşı, o, Seulun təhlükəsizlik mövqeyinin zəifləməməsinin və danışıqlar prosesindən kənarda qalmamasının vacibliyini vurğulayıb.
Vi Sunq-lakın sözlərinə görə, ABŞ və Şimali Koreya arasında dialoqun bərpası Koreya yarımadasında sülhün təmin olunması ilə yanaşı, nüvə məsələsində də konkret irəliləyişlərə gətirib çıxarmalıdır.
Müşavir həmçinin qeyd edib ki, Donald Trampın bu ayın əvvəlində ABŞ və Cənubi Koreyanın keçirdiyi genişmiqyaslı hərbi təlimlərin miqyasını azaltması onun Şimali Koreya lideri Kim Çen Inla yenidən təmasa hazır olduğuna işarədir.
Tramp isə təlimlərin miqyasının azaldılmasını qismən Cənubi Koreyanın İran münaqişəsində ABŞ-yə yardım etməkdən imtina etməsi ilə əlaqələndirib. O, təlimlərin qısaldılmasının Pxenyana yanlış mesaj verdiyini bildirib.
Bununla yanaşı, Seul Vaşinqtonla iqtisadi və hərbi əməkdaşlığın genişləndirilməsində maraqlıdır. Tərəflər arasında ticarət sazişləri, “Coupang” şirkəti ilə bağlı məsələlər və kəşfiyyat məlumatlarının mübadiləsi də gündəmdədir. Həmçinin müharibə dövründə hərbi əməliyyatlara nəzarətin ABŞ-dən Cənubi Koreyaya ötürülməsi məsələsi müzakirə olunur.
Yaponiya, Cənubi Koreya və ABŞ arasında keçiriləcək üçtərəfli təlimlər zamanı Şimali Koreyanın inkişaf edən raket arsenalına qarşı birgə cavab imkanlarının sınaqdan keçirilməsi gözlənilir.
