Xorvatiya milli komandası ənənəvi olaraq Luka Modriç, İvan Perişiç və Mateo Kovaçiç kimi təcrübəli oyunçulara güvənsə də, komandada yeni nəsil dəyişikliyi artıq başlayıb.
"Operativ Məlumat Mərkəzi-OMM" xəbər verir ki, bu dəyişikliyin ən parlaq simalarından biri 19 yaşlı mərkəz müdafiəçisi Luka Vuşkoviçdir.
Xorvatiya millisinin baş məşqçisi Zlatko Daliç gənc oyunçunu yüksək qiymətləndirərək, onu Joşko Qvardiolun layiqli davamçısı adlandırıb.
Vuşkoviç hələ 16 yaşında "Hayduk"un əsas heyətində debüt edərək Xorvatiya liqasının rekordlarını yeniləyib. Onun potensialı Avropa klublarının diqqətindən yayınmayıb və "Tottenhem" 2023-cü ildə futbolçunun transferini rəsmiləşdirib.
Lakin oyun təcrübəsi qazanması üçün o, əvvəlcə Belçikanın "Vesterlo", daha sonra isə Almaniyanın "Hamburq" klublarına icarəyə göndərilib.
Almaniyada keçirdiyi mövsüm Vuşkoviçin karyerasında dönüş nöqtəsi olub. 193 sm boya malik olan müdafiəçi Bundesliqada hava mübarizələrindəki üstünlüyü ilə (74,5% uğurlu hava dueli) rəqibləri üçün keçilməz səddə çevrilib.
Almaniya futbolunun əfsanəsi Lotar Matteus onun oyununu yüksək qiymətləndirərək bildirib:
"O, 18 yaşında olmasına baxmayaraq, meydanda böyük təcrübəyə malik bir futbolçu kimi davranır. Vuşkoviç sadəcə müdafiəçi deyil, həm də komandanın oyununu təşkil edə bilən liderdir".
Hazırda "Tottenhem"ə məxsus olan futbolçunun gələcəyi ilə bağlı müxtəlif iddialar səslənir. Məlumata görə, "Brayton" klubu gənc müdafiəçi üçün ciddi təklif irəli sürüb.
Vuşkoviçin özü isə daha çox oyun vaxtı qazanacağı və inkişaf edə biləcəyi bir mühitdə oynamaq istədiyini vurğulayır.
İnsayderlərin fikrincə, gənc oyunçunun uzunmüddətli hədəfi "Barselona" kimi nəhəng klubların heyətinə düşməkdir. Dünya çempionatında nümayiş etdirəcəyi oyunun onun bazar dəyərini daha da artıracağı gözlənilir.
