Məcburi köçkünlərin öz yurdlarına ləyaqətlə və uzunmüddətli təhlükəsizlik hissi ilə qayıda bilməsi əsas məqsədlərdən biridir.
“Operativ Məlumat Mərkəzi-OMM” xəbər verir ki, bunu Cəbrayıl, Qubadlı və Zəngilan rayonlarında Azərbaycan Prezidentinin xüsusi nümayəndəsi Vahid Hacıyev Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Urbisiddən dirçəlişə: Azərbaycanın azad olunmuş ərazilərində dayanıqlı yenidənqurma, yenidən məskunlaşma və inkişaf" adlı tədbirdə deyib.
Onun sözlərinə görə, regionda günəş enerjisi potensialı kifayət qədər yüksəkdir və binalarda əsasən günəş panellərindən istifadə edilir:
"Biz Qarabağ və Şərqi Zəngəzurda yalnız tikinti ilə kifayətlənmirik. Eyni zamanda, həmin kəndlərin düzgün idarə olunmasını da təmin edirik. Bu məqsədlə gündəlik istifadə etdiyimiz sistemlərdən biri GIS platforması əsasında qurulan ağıllı idarəetmə sistemidir. Bütün kənd və şəhərlər bu sistemə inteqrasiya olunub və biz evlərdən tutmuş qaz xətlərinə qədər lazım olan hər şeyi nəzarətdə saxlaya bilirik".
Xüsusi nümayəndə həmçinin bildirib ki, bütün torpaq sahələri, binalar, yollar və kommunal xətlər dəqiq koordinatlarla rəqəmsal xəritələşdirilib:
"Bu sistem daha sürətli qərar qəbul etməyə imkan verir və gələcək inkişaf prosesinin daha səmərəli idarə olunmasına kömək edir. Eyni zamanda, qurumlar arasında koordinasiyanı gücləndirir və yeni ssenarilərə uyğun dəyişikliklərin birbaşa sistem üzərindən tətbiqinə şərait yaradır".
