ABŞ-ın saxladığı “Marinera” tankerindən 16 ukraynalı dənizçi azad edilib.
“Operativ Məlumat Mərkəzi – OMM” xəbər verir ki, bu barədə Ukraynanın “Suspilne” nəşri dənizçilərlə apardığı söhbətə istinadən məlumat yayıb.
Bildirilib ki, azad olunan dənizçilər mümkün təqiblərdən və dövlətə xəyanət ittihamlarından ehtiyat edərək Ukraynaya qayıtmağı planlaşdırmırlar. Qeyd olunur ki, “kölgə donanması”na aid tankerində olan 17 ukraynalı dənizçidən yalnız baş köməkçi hələ də həbsdə qalır.
Məlumata görə, “Marinera” gəmisində Odessa və Xerson sakinləri, həmçinin Kiyevdən olan bir nəfər çalışıb. Dənizçilərin sözlərinə görə, işə götürülərkən onlara gəminin Rusiya ilə heç bir əlaqəsinin olmadığı və sanksiyalara məruz qalmadığı bildirilib. Eyni zamanda, ilkin mərhələdə Venesuelaya marşrutun planlaşdırılmadığı qeyd edilib.
Nəşr yazır ki, tanker ABŞ tərəfindən saxlanıldıqdan sonra beş ukraynalı dənizçi FTB-yə ifadə verib, digərləri isə istədikləri istiqamətlərə bilet təqdim edildikdən sonra azadlığa buraxılıb.
