Böyük Britaniya Ukraynaya göndərilməsi planlaşdırılan çoxmillətli qüvvələrin yaradılması çərçivəsində 70 nəfərdən ibarət qərargah formalaşdırıb.
“Operativ Məlumat Mərkəzi-OMM” xəbər verir ki, bu barədə məlumat Britaniya hökumətinin rəsmi saytında yerləşdirilən bəyanatda əks olunub.
Mətbuat xidmətinin məlumatına görə, artıq fəaliyyətə başlayan bu qərargahla yanaşı, Britaniya qoşunlarının hazırlıq prosesi üçün hökumət tərəfindən 200 milyon funt-sterlinq məbləğində vəsait ayrılıb.
Layihənin əsas məqsədi gələcəkdə Ukrayna ərazisində beynəlxalq hərbi iştirakı təmin etməkdir.
Qeyd edək ki, yanvarın 6-da Ukrayna lideri Volodimir Zelenski, Fransa Prezidenti Emmanuel Makron və Böyük Britaniyanın Baş naziri Kir Starmer Ukraynaya çoxmillətli qüvvələrin daxil edilməsinə dair niyyət bəyannaməsi imzalayıblar.
Sənəddə söhbət münaqişə başa çatdıqdan sonra Qərb ölkələrinin qoşunlarının bölgədə yerləşdirilməsindən gedir.
Sənəd çərçivə xarakteri daşıyır və yalnız tərəflərin niyyətlərini ifadə edir. Xarici hərbi kontingentin sayı ilə bağlı konkret öhdəlik yoxdur. Yerləşdirmə formatı və müddəti hələlik müəyyən edilməyib.
