OMM Redaksiyası
“Turan” qadın voleybol komandası bu gün CEV Çempionlar Liqasının əsas mərhələsinə vəsiqə uğrunda Bolqarıstanın “Maritsa” klubu ilə cavab oyununa çıxacaq. Bakı vaxtı ilə saat 18:00-da başlayacaq qarşılaşma Tovuz Olimpiya İdman Kompleksində keçiriləcək. Əsas mərhələyə yüksəlmək üçün Tovuz təmsilçisinə qələbə lazımdır.
“Turan” ilk görüşdə Plovdivdə rəqibini 3:0 (25:22, 25:22, 25:20) hesabı ilə məğlub edib. Komanda əvvəlki təsnifat mərhələsində Xorvatiyanın “Mladost” klubunu da iki dəfə yenib: evdə 3:0, səfərdə 3:2.
Azərbaycan klublarının Çempionlar Liqası tarixi
Azərbaycan qadın voleybol klubları sonuncu dəfə 2016/17 mövsümündə əsas mərhələdə çıxış edib. Həmin vaxt “Azərreyl” və “Telekom” qrup mərhələsində mübarizə aparıb. “Azərreyl” altı oyunda dörd qələbə ilə 11 xal toplayaraq qrupda ikinci olub, lakin növbəti mərhələyə yüksəlməyib. “Telekom” isə altı matçın hamısında uduzaraq xalsız qalıb.
Azərbaycan klubları arasında Çempionlar Liqasının ən böyük uğurlarına “Rabitə” imza atıb: komanda 2010/11 və 2012/13 mövsümlərində gümüş, 2013/14 mövsümündə isə bürünc medal qazanıb. “Azərreyl” 2003/04 mövsümündə “Dördlər finalı”nda çıxış edərək turniri dördüncü yerdə başa vurub.
Kişi klubları isə Çempionlar Liqasının əsas mərhələsində indiyədək iştirak etməyib.
