Afət Ziyadqızı
ABŞ Prezidenti Donald Tramp Kanada ilə ticarət münasibətləri ilə bağlı sərt bəyanatla çıxış edib.
“Operativ Məlumat Mərkəzi – OMM” xəbər verir ki, Tramp sosial media hesabında Kanadanın uzun illərdir ABŞ-ni iqtisadi baxımdan “aldatdığını” iddia edib və iki ölkə arasında 60 milyard dollarlıq ticarət kəsirinin qəbuledilməz olduğunu bildirib.
Trampın sözlərinə görə, 1 yanvar 2027-ci ildən etibarən Kanadadan idxal olunan avtomobillər, yük maşınları, avtomobil ehtiyat hissələri və polad məhsullarına gömrük rüsumları 50 faizə qaldırılacaq.
ABŞ Prezidenti amerikalı istehsalçıları ölkə daxilində istehsalı artırmağa çağıraraq, ABŞ-də istehsal olunan məhsulların sıfır rüsumla satılacağını vurğulayıb.
Tramp həmçinin Kanadanı ticarət sahəsində əməkdaşlıq edilməsi ən çətin ölkələrdən biri adlandırıb. O, ABŞ-nin Kanadaya ehtiyacının olmadığını, əksinə, Kanada iqtisadiyyatının ABŞ-dən ciddi şəkildə asılı olduğunu bildirib.
Qeyd edək ki, ötən həftə ABŞ və Kanada arasında keçirilən ticarət danışıqları nəticəsiz başa çatıb.
Kanadanın Baş naziri Mark Karni ABŞ-nin təklif etdiyi şərtləri “iqtisadi cəhətdən qeyri-mümkün və ədalətsiz” adlandırıb. O, Vaşinqtonun yeni rüsumlarına qarşı Kanada işçilərini, fermerləri və biznes sektorunu qorumaq üçün adekvat tədbirlər görüləcəyini açıqlayıb.
