ABŞ Prezidenti Donald Tramp Ontario Gölünün adının “Amerika Gölü” olaraq dəyişdirilməsi ilə bağlı rəsmi fərman imzalayıb.
“Operativ Məlumat Mərkəzi – OMM” xəbər verir ki, bu qərar ABŞ və Kanada arasında ticarət danışıqlarının dalana dirənməsi və Vaşinqtonun 20 milyard dollarlıq Kanada məhsullarına 50 faiz yeni gömrük rüsumu tətbiq etməsindən sonra qəbul edilib. Kanada tərəfi isə gələn ay ABŞ-yə qarşı əks-tariflər tətbiq edəcəyini açıqlayıb.
İmzalanan fərmana əsasən, ABŞ Daxili İşlər Nazirliyinə “ABŞ Coğrafi İsimlər Məlumat Sistemi”ndə müvafiq dəyişiklikləri aparmaq üçün 30 gün vaxt verilib. Tramp qərarın rəsmən qüvvəyə mindiyini bildirib.
Kanada Baş naziri Mark Carney isə qərara etiraz edib. O, gölün adının 400 ildən artıq tarixə malik olduğunu və həm Kanada Konfederasiyasının yaradılmasından, həm də ABŞ-nin Müstəqillik Bəyannaməsindən əvvəl istifadə edildiyini vurğulayıb. Carney “Bu gölün adı bu gün və sonsuza qədər Ontario Gölüdür” deyə bildirib.
Qeyd edək ki, Tramp 2025-ci ildə də oxşar addım ataraq Meksika Körfəzinin adını “Amerika Körfəzi” olaraq dəyişdirmişdi. Bu qərar Meksikanın etirazına səbəb olmuş, həmçinin “Google Maps”də istifadəçilərin yerləşdikləri ölkəyə görə körfəzin fərqli adlarını görməsi ilə bağlı mübahisə yaranmışdı.
ABŞ daxilində də yeni qərara qarşı etirazlar səslənib. Miçiqan ştatından olan konqresmen Debbie Dingell qərarı “axmaqca” adlandıraraq onun ləğvi üçün qanun layihəsi təqdim edəcəyini bildirib. Bir sıra ştat rəsmiləri də gölün adının dəyişdirilməsini tanımayacaqlarını açıqlayıblar.
