Tərtər rayonunun Buruc kəndində bir tövlədə istehlaka yararsız vəziyyətdə olan at ətinin aşkarlanması üzrə əməliyyat keçirilib. Ümumi çəkisi 146,8 kiloqram olan sümükdən ayrılmış at əti ilə yanaşı, bir ədəd at başı və sümükləri də aşkarlanıb.
"Operativ Məlumat Mərkəzi-OMM"-in məlumatına görə, faktla bağlı Azərbaycan Qida Təhlükəsizliyi Agentliyinin (AQTA) Qarabağ regional bölməsi və Daxili İşlər Nazirliyinin (DİN) Tərtər Rayon Polis Şöbəsi əməkdaşları birgə reyd həyata keçiriblər.
Araşdırmalar zamanı məlum olub ki, atı eyni kənd sakinləri Məmmədov Seymur Baloğlan oğlu və Cəfərli Həsən İntiqam oğlu tövləyə gətirərək, qəssab Quliyev Seyfəddin Arif oğlu ilə birlikdə kəsiblər və sümükdən ayrılmış ət paketlərə yığılıb. Onların niyyəti həmin at ətini mal əti adı altında sataraq Bakı şəhərinə Cəfərov Elməddin Bulud oğluna göndərmək olub.
İstehlaka yararsız hesab olunan at ətindən nümunələr götürülərək, soyuducu anbarda müvəqqəti saxlanılıb. Faktla bağlı araşdırmalar davam etdirilir.
