İranın hazırkı hökuməti ABŞ tərəfindən ölkəyə endirilə biləcək mümkün hərbi zərbənin mövcud hakimiyyətin devrilməsinə və kütləvi etirazların yenidən başlamasına səbəb olacağından ciddi narahatlıq keçirir.
"Operativ Məlumat Mərkəzi-OMM" xəbər verir ki, bu barədə "Reuters" agentliyi İranın rəsmi şəxslərinə istinadən məlumat yayıb.
Məlumata görə, ölkənin ali rəhbəri ayətullah Əli Xameneiyə təqdim olunan hesabatlarda yanvar ayındakı aksiyaların güc tətbiq edilməklə yatırılmasının xalq arasındakı qəzəbi pik həddə çatdırdığı bildirilir.
Qeyd olunur ki, İran vətəndaşları artıq qorxu hissini geridə qoyublar və bu faktor artıq onları dayandırmaq üçün yetərli deyil.
Eyni zamanda, nüvə danışıqlarını bərpa etmək və regional sabitliyi müzakirə etmək məqsədilə fevralın 6-da Türkiyədə ABŞ və İran nümayəndələrinin görüşü planlaşdırılır. Lakin yaranmış gərgin vəziyyət və gözlənilməz amillər səbəbindən bu danışıqların təxirə salınması və ya tamamilə ləğv edilməsi ehtimalı da gündəmdədir.
