OMM Redaksiyası
Bazar ertəsinə keçən gecə Rusiya Ukraynanın Qara dəniz sahilindəki Odessa limanına PUA hücumu həyata keçirib.
"Operativ Məlumat Mərkəzi-OMM" xəbər verir ki, regionun qubernatoru Oleq Kiperin "Telegram" tətbiqində verdiyi məlumata görə, hücum nəticəsində biri uşaq olmaqla üç nəfər həyatını itirib, 10 nəfər isə yaralanıb.
Kiper qeyd edib ki, yaşayış binaları, kritik infrastruktur və inzibati obyektlər hədəf alınıb.
Müharibənin davam etdiyi bir vaxtda Moskva Ukraynanın cənubundakı əsas logistika mərkəzi və taxıl ixracının böyük hissəsini həyata keçirən Odessaya hücumları intensivləşdirib.
Rusiyanın nəzarətində olan Luqansk vilayətindəki Biloriçenska kömür mədəninə endirilən zərbə nəticəsində elektrik yarımstansiyası zədələnib və 41 mədənçi yeraltında qalıb.
Rusiya Müdafiə Nazirliyi qısa müddət ərzində 148 Ukrayna dronunun hava hücumundan müdafiə sistemləri tərəfindən vurulduğunu iddia edib.
Belqorod vilayətində PUA hücumu nəticəsində mülki müdafiə könüllüsü həlak olub, Novorossiyskdə isə çoxmərtəbəli yaşayış binasına ziyan dəyib.
Bununla yanaşı, Rusiyanın işğalı altındakı Donetsk və Makeyevka şəhərlərində Ukraynanın enerji infrastrukturuna hücumlarından sonra elektrik enerjisinin verilişi qismən bərpa edilib. Krımın Sevastopol şəhərində də gün ərzində dörd dron hücumunun qeydə alındığı bildirilir.
