Rusiya tərəfi Aİ-nin Ermənistandakı missiyasının İrəvanın təsdiqi ilə daimi status ala biləcəyindən narahatdır.
"Operativ Məlumat Mərkəzi-OMM" xəbər verir ki, bunu yerli KİV-ə Rusiya Federasiyası Xarici İşlər Nazirinin müavini Mixail Qaluzin deyib.
Mart ayında Ermənistan parlamenti Avropa İttifaqı ilə 2023-cü ilin noyabrında imzalanmış Azərbaycan sərhədində Aİ missiyasının statusu haqqında sazişi təsdiqləyib. Bu saziş müşahidəçilərə toxunulmazlıq və imtiyazlar verir.
Qaluzin həmçinin qeyd edib ki, bu ilin aprelində Kanada nümayəndələri də Aİ missiyası çərçivəsində çıxış ediblər. Bu, onun fikrincə, NATO-nun Cənubi Qafqaza nüfuz etdiyini göstərir. Rusiya tərəfi Aİ missiyasının fəaliyyətinin Rusiya hədəfləri və Ermənistanın İran və Türkiyə kimi qonşu dövlətləri haqqında kəşfiyyat məlumatlarının toplanmasına yönəldiyindən narahatlığını ifadə edir.
“Biz Aİ-nin Ermənistandakı missiyasının fəaliyyətini mənfi qiymətləndiririk, dəfələrlə dediyimiz kimi, Avropa İttifaqının vəzifəsi aydındır, ənənəvi tərəfdaşların və qonşuların maraqlarına zərər verərək regionda (Cənubi Qafqaz dövlətləri – Rusiya, İran, Türkiyə) möhkəmlənməyə çalışmaqdır”, - deyə Qaluzin bildirib.
Rusiya Xarici İşlər Nazirliyinin nümayəndəsi vurğulayıb ki, Rusiya dəfələrlə Aİ-nin Ermənistandakı missiyasına mənfi münasibət bildirib və müşahidəçilərin fəaliyyəti konkret nəticə vermir və Ermənistan-Azərbaycan sərhədində vəziyyətin pisləşməsinin qarşısını almır.
O, həmçinin qeyd edib ki, missiyanın hesabatları birbaşa Brüsselə göndərilib və Ermənistan tərəfinə verilməyib.
