OMM Redaksiyası
“Qarabağ”ın baş məşqçisi Qurban Qurbanov “Zirə” üzərində 3:1 hesablı qələbə ilə başa çatan yoxlama oyunundan sonra komandanın hazırlığı barədə danışıb. O, görüşü maraqlı adlandırıb və bütün futbolçulardan istifadə edə bilmədiklərini bildirib.
Mütəxəssisin sözlərinə görə, komandada olan oyunçulara müəyyən yük verilib. Qarşılaşmanın 50-60 dəqiqəsindəki temp isə rəsmi oyunlardan geri qalmayıb.
Qurbanov Yamayka millisində zədələnən Renaldo Sefasın sabah kluba qayıdacağını, günün ikinci yarısında tibbi müayinədən keçəcəyini deyib. Futbolçunun vəziyyəti müayinədən sonra dəqiqləşəcək.
Millilərin oyunları və fasilənin təsiri
Baş məşqçi çempionatda yaranan uzun fasilənin komandaya müsbət təsir etmədiyini vurğulayıb. O, heyətdə oyunçu sayının az olduğunu, millilərə çağırılan futbolçuların qısa müddətdə dörd oyun keçirməsinin böyük yük yaratdığını qeyd edib. Sefasın dörd gündür geri qayıda bilmədiyini, digər futbolçuların da komandaya uyğunlaşmaq üçün vaxta ehtiyacı olacağını bildirib.
Qurbanov Azərbaycan millisinin Lixtenşteynlə 0:0 hesablı heç-heçəsinə və Litva ilə qarşıdakı oyuna da münasibət bildirib. Onun fikrincə, müasir futbolda zəif hesab edilən komandalarla belə asan oyun keçirmək mümkün deyil, çünki futbolçuların və məşqçilərin beynəlxalq təcrübəsi artır.
“Heç kim asanlıqla qələbə qazanmır”, – deyən çalışdırıcı mənfi fikirlərdən uzaqlaşıb qarşıdakı iki oyuna köklənməyin və maksimum nəticə qazanmağa çalışmağın vacibliyini vurğulayıb.
