Afət Ziyadqızı
Qırğızıstan və Özbəkistan 2022-ci ildə imzalanmış sərhəd sazişinin icrasına rəsmən başlayıb.
“Operativ Məlumat Mərkəzi-OMM” xəbər verir ki, bu addım iki ölkə arasında sərhədlərin delimitasiya prosesinin başa çatdırılması və yeni infrastruktur layihələrinin həyata keçirilməsi məqsədi daşıyır.
Məlumata görə, Qırğızıstanın Qədəmçay rayonunda fəaliyyətə başlayan birgə komissiya razılaşmanın hüquqi və inzibati prosedurlarına nəzarət edir. Razılaşmaya əsasən, əvvəllər Özbəkistanın Fərqanə vilayətinə aid olan Çonq-Qara və Daş-Tobo kəndləri Qırğızıstanın yurisdiksiyasına keçiriləcək.
Bildirilib ki, həmin yaşayış məntəqələrində əksəriyyəti etnik qırğızlardan ibarət olmaqla təxminən 2 500 nəfər yaşayır. Hazırda qeydiyyat prosesi davam edir və bu mərhələ başa çatdıqdan sonra sakinlər Qırğızıstan vətəndaşlığı almaq hüququ əldə edəcəklər. Bunun müqabilində Qırğızıstan Özbəkistana ekvivalent ərazidə torpaq sahəsi verəcək.
Qeyd olunub ki, razılaşma Mərkəzi Asiyada Sovet İttifaqının dağılmasından sonra həllini tapmayan sərhəd mübahisələrinin aradan qaldırılması istiqamətində atılan addımların davamıdır. Qırğızıstan rəsmilərinin sözlərinə görə, torpaq mübadiləsi sərhədin mübahisəli hissələrinin tam həllinə və sərhədyanı bölgələrin inkişafına töhfə verəcək.
Məlumata əsasən, saziş çərçivəsində Say və Tayan kəndlərini birləşdirəcək yeni avtomobil yolunun tikintisi üçün 236 hektar ərazi mübadiləsi də həyata keçiriləcək. Layihənin nəqliyyat əlaqələrini yaxşılaşdıracağı, yerli sakinlərin gediş-gəliş vaxtını azaldacağı və bölgədə iqtisadi fəallığı artıracağı bildirilir.
