İsrail ordusu Qəzzanın mərkəzindəki Deyr əl-Belah şəhərini növbəti dəfə bombalayıb.
"Operativ Məlumat Mərkəzi-OMM" xarici KİV-ə istinadən xəbər verir ki, son sutka ərzində şəhərdəki qaçqın düşərgəsi, BMT-nin 2 məktəbi və məscid hədəfə alınıb.
Hücumlar nəticəsində ümumilikdə ən azı 156 nəfər həlak olub.
Fələstin rəsmiləri, İsrailin hücumlar zamanı istifadəsi qadağan olan fosfor bombalarından istifadə etdiyini iddia edib.
İsrail ordusunun sözçüsü Daniel Haqari, Livan və Yəməndən İsrail ərazisinə doğru raket zərbələri endirildiyini, raketlərin HHMS tərəfindən zərərsizləşdirildiyini bildirib.
Haqari, müharibənin plana uyğun şəkildə irəlilədiyini, lakin bundan sonra bir neçə ay davam edə biləcəyini vurğulayıb.
Qeyd edək ki, 7 oktyabrda İsrail ərazisini atəşə tutması ilə başlayan müharibə ərzində Qəzzada ümumilikdə ən azı 22 300 insan həlak olub. Onların 70%-ini uşaq və qadınlar təşkil edir.
57 mindən çox insanın yaralandığı, 8 minə yaxın insanın itkin düşdüyü bildirilir.
