Afət Ziyadqızı
Rusiya Prezidenti Vladimir Putin ölkənin silahlı qüvvələrining sayının artırılması barədə qərar qəbul edib. Yeni tənzimləməyə əsasən, ordunun ümumi şəxsi heyəti 2 milyon 441 min 630 nəfərə çatıb.
“Operativ Məlumat Mərkəzi-OMM” xəbər verir ki, bu barədə müvafiq fərman imzalanıb.
Qərarla aktiv hərbi qulluqçuların sayı 15 min 500 nəfər artırılaraq 1 milyon 550 minə çatdırılıb.
Ukrayna Prezidenti Volodimir Zelenski Rusiyanın ərazisində 8 mindən çox Şimali Koreya hərbçisinin olduğunu bildirib. Onun sözlərinə görə, daha 10 min əsgərin yerləşdirilməsi üçün hazırlıq aparılır.
Zelenski qeyd edib ki, Şimali Koreya hərbçiləri əvvəlcə təlim üçün seçilir, daha sonra Rusiyaya göndərilir. Rusiya Prezidenti Vladimir Putin və Şimali Koreya lideri Kim Çen In Pxenyanın Rusiyaya dəstək məqsədilə hərbçi göndərdiyini təsdiqləmiş və bu şəxsləri qəhrəman adlandırmışdılar.
Ukrayna və Cənubi Koreyanın qiymətləndirməsinə əsasən, Şimali Koreya 2024-cü ildən etibarən Rusiyanın Ukraynadakı müharibəsini dəstəkləmək üçün təxminən 14-15 min hərbçi göndərib. Onların böyük hissəsinin Ukraynanın sərhədyanı əməliyyatının qarşısını almaq məqsədilə Kursk vilayətində yerləşdirildiyi bildirilir.
Rusiyanın Ukraynaya davam edən hücumları fonunda çərşənbə axşamı səhər saatlarında Kiyevdə partlayış səsləri eşidilib.
Kiyev meri Vitali Kliçko raket qalıqlarının yaşayış evlərindən birinin həyətinə düşdüyünü, şəhərin digər hissəsində isə qeyri-yaşayış binasında yanğın baş verdiyini açıqlayıb.
Zelenski isə ölkə üzrə və Kiyevdə həyata keçirilən Rusiya pilotsuz uçuş aparatı hücumları nəticəsində 9 nəfərin öldüyünü, 80-dən çox şəxsin yaralandığını deyib.
Roma Papası XIV Leo Rusiya və Ukraynanı müharibəni dayandırmaq üçün danışıqlar masasına oturmağa çağırıb. O, liderlərin bir araya gələrək dialoq qurmasının vacibliyini vurğulayıb.
NATO-nun yüksək rütbəli hərbi komandanı general Aleksus Qrinkeviç Rusiyanın Avropadakı mümkün təxribatlarının müttəfiqlərin Ukraynaya dəstəyinə mane ola bilmədiyini bildirib. O, bu cür addımların qorxu yaymağa və müttəfiqlərin birliyini pozmağa hesablandığını, lakin buna nail olunmadığını söyləyib.
Ukraynanın Baş naziri Sergey Koretski xarici yardımın gecikməsi səbəbindən yenidənqurma işləri də daxil olmaqla bəzi xərclərlə bağlı öhdəliklərin təxirə salınacağını açıqlayıb. Onun sözlərinə görə, layihələr daha sonra tamamlanacaq, hazırda isə bütün resurslar kritik sahələrə yönəldilməlidir.
Putin Almaniyanın pərakəndə satış şirkəti “Metro AG”nin Rusiyadakı aktivlərinin müvəqqəti idarəetməyə verilməsi barədə göstəriş verib. Qərar Rusiya ilə Almaniya arasında Ukrayna müharibəsi fonunda artan gərginlik şəraitində qəbul olunub.
Ötən gün səhər saatlarında Rusiyaya məxsus reaktiv mühərrikli pilotsuz uçuş aparatı Polşa sərhədinə yaxın Ukrayna kəndinə zərbə endirib. Hücum nəticəsində sərhəd-keçid məntəqəsinə ziyan dəydiyi bildirilir. Polşa sərhədinə yaxın ərazilərə son həftələrdə artan hücumlar Varşava və Avropadakı müttəfiqlərinin narazılığına səbəb olub.
