Polşa ABŞ Dövlət Departamentindən “Patriot” hava hücumundan müdafiə sistemi üçün raketlərin istehsalına ilkin razılıq alıb.
"Operativ Məlumat Mərkəzi-OMM" xəbər verir ki, bu barədə Polşanın müdafiə nazirinin müavini Sezari Tomçik bildirib.
“Biz ABŞ-dən “Patriot” sistemi üçün raket istehsalına ilkin razılıq almışıq. Bu raketləri Polşanın müdafiə sənayesi istehsal edəcək. Polşa ərazisində bunun üçün kifayət qədər istehsal imkanları var”, - o qeyd edib.
Tomçikin sözlərinə görə, həmin raketlərin istehsalı üçün Polşa və ABŞ arasında birgə konsorsium yaradıla bilər.
“Bu layihədən həm polyaklar, həm də amerikalılar gəlir əldə edə bilər. Çünki söhbət ortaq istehsaldan gedir”, – o əlavə edib.
Qeyd olunub ki, ilkin razılıq may ayında Polşa Müdafiə Nazirliyinin müavinləri Sezari Tomçik və Pavel Zalevskinin ABŞ-yə səfəri zamanı əldə olunub.
Məlumata əsasən, söhbət PAC-3 MSE tipli uzaqmənzilli raket-tutucularından gedir.
