Sakit okeanın Meksika sahilləri yaxınlığında tüğyan edən “Polo” qasırğası sürətlə güclənərək dördüncü kateqoriya fırtına səviyyəsinə çatıb.
“Operativ Məlumat Mərkəzi-OMM” xəbər verir ki, bu barədə Mayamidə yerləşən ABŞ Milli Qasırğa Mərkəzi (NHC) məlumat yayıb.
Məlumata görə, küləyin maksimual sürəti saatda 215 kilometrə çatır. Sinoptiklər qasırğanın yaxın günlərdə daha da şiddətlənərək Saffir-Simpson şkalası üzrə ən yüksək təhlükə həddi olan beşinci kateqoriyaya çata biləcəyi barədə xəbərdarlıq ediblər.
Qasırğanın bilavasitə quruya çıxması gözlənilməsə də, onun mərkəzinin Meksikanın cənub-qərb sahillərinə yaxın keçəcəyi bildirilir. Bu səbəbdən Gerrero və Miçoakan ştatlarının sahil zonalarında cümə axşamına qədər şiddətli yağışlar proqnozlaşdırılır.
Qurum güclü yağıntıların xüsusilə dağlıq ərazilərdə həyat üçün təhlükə törədə biləcək daşqınlara və torpaq sürüşmələrinə səbəb ola biləcəyini diqqətə çatdırıb. Sahil boyu yerləşən Kolima və Xalisko ştatlarında da fırtına xəbərdarlığı elan edilib.
