OMM Redaksiyası
“Barselona”nın baş məşqçisi Hansi Flik La Liqanın 12-ci turunda “Atletiko Madrid”i 2:1 hesabı ilə məğlub etdikləri oyundan sonra komandasının çıxışını dəyərləndirib.
Flik fasiləyə qədər hesabı bərabərləşdirməyin vacib olduğunu bildirib. O, rəqibə təzyiq göstərməyin və topa nəzarət etməyin asan olmadığını, ikinci hissənin isə yaxşı keçdiyini deyib.
“Sevinirəm, qələbəyə layiq idik. Bu, daha üç xaldır. Belə oyunlarda qalib gəlmək üçün kifayət qədər səviyyəmiz var və bu komandaya inanıram. Burada qalib gəlmək asan deyil”, – deyə Flik Marca-ya bildirib.
Baş məşqçi mövsümün uzun yol olduğunu vurğulayaraq, komandanın kuboklar qazanmaq və uğur əldə etmək üçün hər gün çalışdığını qeyd edib.
