Davosda keçiriləcək illik Dünya İqtisadi Forumunda (DİF) Ukrayna məsələsi əsas gündəmdən düşə bilər.
"Operativ Məlumat Mərkəzi-OMM" "Politico" nəşrinə istinadən xəbər verir ki, Avropa tərəfi hazırda diqqəti Qrenlandiya ətrafında yaranmış gərginliyə yönəltməyə məcburdur.
Məlumata görə, avropalı rəsmilər əslində Ukrayna üzrə sülh danışıqlarını müzakirə etməyi planlaşdırsalar da, ABŞ Prezidenti Donald Trampın Qrenlandiyanı ABŞ-yə birləşdirmək istəyi əsas müzakirə mövzusuna çevrilib.
Avropa tərəfi bu vəziyyəti "son onilliklərin ən ciddi transatlantik böhranı" kimi xarakterizə edir.
Forum çərçivəsində aşağıdakı məsələlərin ön plana çıxacağı gözlənilir:
- Trampın Qrenlandiya səbəbindən NATO-nun fəaliyyətinə xələl gətirməsinin qarşısını almaq;
- ABŞ lideri ilə Aİ və NATO rəhbərliyi arasında keçiriləcək şəxsi görüşlər;
- Qrenlandiyanın statusu ilə bağlı yaranmış diplomatik gərginliyin həlli.
Xatırladaq ki, Donald Tramp hələ ilk prezidentliyi dövründə Qrenlandiyanı satın almağı təklif etmişdi. 2025-ci ilin martında isə o, adanın ilhaq edilməsinin mümkünlüyünü yenidən gündəmə gətirib. Ağ Ev rəsmiləri Danimarkanın ada üzərindəki nəzarət hüququnu şübhə altına alıblar.
Qrenlandiya Danimarkanın tərkibində muxtar ərazidir. 1951-ci ildə imzalanmış müqaviləyə əsasən, ABŞ adanın müdafiəsinə cavabdehlik daşıyır.
