İran prezidenti Məsud Pezeşkian ABŞ-nin regionda gərginliyi artıran fəaliyyətlərindən sonra yaranmış vəziyyəti müzakirə etmək məqsədilə Qətər Əmiri Şeyx Təmim bin Həməd Al Sani və Pakistanın Baş naziri Şahbaz Şərif ilə telefon danışığı aparıb.
"Operativ Məlumat Mərkəzi-OMM" xəbər verir ki, bu barədə İran Prezident Administrasiyası məlumat yayıb.
Telefon danışığı zamanı Pezeşkian Qətər və Pakistanın İrana nümayiş etdirdiyi həmrəyliyi yüksək qiymətləndirərək, İslam dünyasında birliyin və əməkdaşlığın gücləndirilməsinin vacibliyini vurğulayıb.
O, rəsmi Tehranın xarici siyasətinin beynəlxalq hüquq normalarına, bərabərhüquqlu tərəfdaşlığa və təhdidlərdən uzaq diplomatiya anlayışına əsaslandığını qeyd edib.
Prezident Pezeşkian bildirib ki, əgər ABŞ həqiqətən də danışıqlar və diplomatiya tərəfdarıdırsa, bunu əməli addımları ilə sübut etməli, təxribatçı hərəkətlərə son qoymalıdır.
Qətər Əmiri və Pakistanın Baş naziri isə öz növbələrində İranın təhlükəsizliyinə, müstəqilliyinə və ərazi bütövlüyünə qarşı yönəlmiş hər hansı müdaxilə və sanksiyalara qarşı olduqlarını ifadə ediblər.
Liderlər xəbərdarlıq ediblər ki, regionda baş verə biləcək mümkün münaqişə genişmiqyaslı qeyri-sabitliyə və zorakılıq dalğasına səbəb ola bilər.
