Afət Ziyadqızı
Rusiya Federasiyası Prezidentinin mətbuat katibi Dmitri Peskov qızı, fiqurlu konki sürən Nadejda Peskova barədə danışarkən onun gələcəkdə olimpiya çempionu tituluna yiyələnəcəyinə ümid etdiyini bildirib.
"Operativ Məlumat Mərkəzi-OMM" xəbər verir ki, D.Peskov "RİA Novosti" agentliyinə açıqlamasında bu yolun son dərəcə çətin və rəqabətli olduğunu vurğulayıb.
"Əlbəttə, valideyn olaraq hamımız buna ümid etmək istərdik. Lakin bu, olduqca mürəkkəb prosesdir. Minlərlə, hətta on minlərlə idmançı yüksək nəticələr üçün can atır, lakin yalnız bir neçəsi zirvəyə nail ola bilir", – deyə rəsmi nümayəndə qeyd edib.
Nadejda Peskova buz üzərində rəqs növündə Andrey Çelekovla cütlükdə çıxış edir. İdmançılar tanınmış mütəxəssis Anjelika Krılovanın məşqçi qrupunun rəhbərliyi altında hazırlıq keçirlər.
Gənc cütlük bir müddət əvvəl olimpiya çempionu Yevgeni Plyuşenkonun mükafatı uğrunda təşkil olunan turnirdə debüt edərək ilk rəsmi yarış təcrübəsini qazanıb.
