Afət Ziyadqızı
Pakistan İslama Respublikasının şimal-qərbində yerləşən Peşəvər şəhərində dəhşətli faciə baş verib. Şəhərin Əfridi Abad (Afridi Abad / Dir Colony) ərazisində fəaliyyət göstərən özəl məktəb binasının damının kütləvi şəkildə çökməsi nəticəsində azı 17 şagird həlak olub.
"Operativ Məlumat Mərkəzi-OMM" xəbər verir ki, Pakistanın mötebər “Dawn” qəzetinin təqdim etdiyi məlumata əsasən, “Lady Reading” Mərkəzi Xəstəxanasının rəsmi sözçüsü Məhəmməd Asim həyatını itirən azyaşlıların hamısının 13 və daha aşağı yaş qrupuna aid olduğunu bildirib. Hadisə ilə əlaqədar tibb müəssisəsində fövqəladə vəziyyət rejimi elan olunub.
Pakistanın “Rescue 1122” təcili xilasetmə xidmətinin rəsmi nümayəndəsi Bilal Əhməd Faizi fəlakət zonasına dərhal xüsusi briqadaların cəlb edildiyini diqqətə çatdırıb. Xilasedicilər dağıntılar altından tələbə və müəllimlər də daxil olmaqla, 20-dən çox ağır yaralını çıxararaq xəstəxanalara təxliyə ediblər. Ərazidə axtarış-xilasetmə əməliyyatları aramsız olaraq davam etdirilir.
Mütəxəssislər Pakistanda tikili və binaların uçması hallarının tez-tez baş verməsini texniki təhlükəsizlik normasının zəif tətbiqi, dövlət nəzarətinin yetərsizliyi və tikintidə keyfiyyətsiz materiallardan istifadə olunması ilə əlaqələndirirlər.
Xatırladaq ki, cari ilin iyun ayında Lahor şəhərinin Kahna ərazisində analoji hadisə qeydə alınmış, özəl hazırlıq mərkəzinin damının uçması nəticəsində 14 məktəbli həlak olmuşdu.
