Nigeriyanın iri şəhərlərində inflyasiyaya qarşı etirazların səbəb olduğu iğtişaşlarda ölənlərin sayı 14 nəfərə çatıb.

"Operativ Məlumat Mərkəzi-OMM" xəbər verir ki, bu barədə yerli KİV məlumat yayıb.

Daha əvvəl “Daily Post” dörd nəfərin öldüyünü bildirmişdi.

Etiraz aksiyaları həm də yolların bağlanması, eyni zamanda, maliyyə institutlarının və digər müəssisələrin fəaliyyətinin dayandırılması, habelə dövlət və xüsusi mülkiyyətin talan edilməsi dağıdılması ilə müşayiət olunur.

İyulun əvvəlində Nigeriyanın ən böyük həmkarlar ittifaqları federal hökumətlə minimum əmək haqqı ilə bağlı razılığa gələ bilmədikdən sonra tətil etmək qərarına gəliblər. “Punch” nəşrinin daha əvvəl xəbər verdiyi kimi, hökumət rəsmiləri bu məbləği ayda 60 min nayr (təxminən 37 dollar) məbləğində müəyyənləşdirməyi təklif ediblər.

İsrail Silahlı Qüvvələrinin Suriyanın Masyaf şəhərinə endirdiyi zərbələr nəticəsində ölənlərin sayı 15 nəfərə çatıb.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

34 nəfərin yaralandığı bildirilir.

İsrailin Qəzza zolağının mərkəzinə endirdiyi hava zərbəsi zamanı 7 nəfər həlak olub.

"Operativ Məlumat Mərkəzi-OMM" xəbər verir ki, bu barədə "Əl-Cəzirə" telekanalı məlumat yayıb.

İsrail döyüş təyyarələrinin Fələstinin mərkəzi anklavında yerləşən Nuseyrat qaçqın düşərgəsində yaşayış binalarını bombalaması nəticəsində azı 3 nəfər ölüb, 7 nəfər yaralanıb.

Bundan əlavə, İsrailin Qəzza zolağının mərkəzi hissəsində də yerləşən Əl-Bureyc qaçqın düşərgəsinə endirdiyi hava zərbəsi nəticəsində 4 nəfər ölüb, 1 nəfər yaralanıb.

Boliviya hökuməti meşə yanğınları ilə əlaqədar bütün ölkə ərazisində fövqəladə vəziyyət elan etmək qərarına gəlib.

"Operativ Məlumat Mərkəzi-OMM" xarici KİV-ə istinadən xəbər verir ki, bu barədə ölkənin müdafiə naziri Edmundo Noviglio bildirib.

Yanğınlar nəticəsində yaranan havanın çirklənməsi səbəbindən ölkədə, həmçinin “sanitariya təhlükəsi” elan edilib.

"Zərərçəkən ərazilərə göndərilən çevik qrupları sayəsində biz əhaliyə, yanğınsöndürənlərə və yanğınlarla yorulmadan mübarizə aparan könüllülərə köməklik göstərə bildik. Pando departamentlərində bu günə kimi 6162 nəfərə tibbi yardım göstərilib”, - deyə Boliviya Prezidenti Luis Arce "X" sosial hesabında yazıb.

Boliviya hakimiyyəti kömək üçün bir sıra ölkələrə müraciət edib.

Səlahiyyətlilərin məlumatına görə, hazırda Boliviyada 72 aktiv yanğın var. Ümumilikdə 3,8 milyon hektar ərazi yanğınlara məruz qalıb.

İsrail gecə saatlarında Suriyanın mərkəzinə hücum edib.

"Operativ Məlumat Mərkəzi-OMM" xarici KİV-ə istinadən xəbər verir kİ, Suriya Livanın hava məkanından endirilən zərbələr nəticəsində azı 5 nəfər ölüb, daha 19 nəfər yaralanıb. 

Suriya dövlət mediasının xəbərinə əsasən, hücum zamanı ölkənin bir neçə hərbi hissələri hədəfə alınıb.

Həmin hərbi hissələrdə Rusiya və ABŞ qüvvələrinin də fəaliyyət göstərdiyi bildirilir. 

Eyni zamanda raket zərbələri Suriyanın qərbində yerləşən Masyaf şəhəri yaxınlığında yanğına səbəb olub. 

Suriya hava hücumundan müdafiə qüvvələri  raketlərin bir qismini zərərsizləşdirib.

Yerli mətbuatın xəbərinə əsasən, hərbi bazaların hədəfə alınmasına baxmayaraq, həlak olanların hamısı mülki şəxslər olub.

Sudanda ötən ilin aprelindən davam edən münaqişə 20 mindən çox insanın ölümünə səbəb olub.

"Operativ Məlumat Mərkəzi-OMM" xəbər verir ki, bu barədə Ümumdünya Səhiyyə Təşkilatının (ÜST) Baş direktoru Tedros Adhanom Qebreyesus bildirib.

O, dərhal atəşkəsə və humanitar tədbirlərə beynəlxalq maliyyə dəstəyini artırmağa çağırıb.

Baş direktor xatırladıb ki, Sudanda münaqişə səbəbindən 10 milyondan çox insan ölkə daxilində evlərini tərk etmək məcburiyyətində qalıb, daha 2 milyon insan isə qonşu ölkələrə qaçmağa məcbur olub.

“Fövqəladə vəziyyətin miqyası, eləcə də münaqişənin qarşısını almaq və onun gətirdiyi əzablara cavab vermək üçün görülən tədbirlərin qeyri-adekvatlığı sarsıdıcıdır”, - deyə ÜST-ün rəhbəri qeyri-kafi maliyyə səviyyəsinə, çoxlu sayda hücumlara diqqət çəkib.

Qeyd edək ki, Sudanda vəziyyət 2023-cü ilin aprelində ölkənin Suveren Şurasının sədri ilə ordu komandiri və Çevik Reaksiya Qüvvələrinin rəhbəri arasında fikir ayrılığı səbəbindən gərginləşib. Onların arasında əsas ziddiyyətlər vahid silahlı qüvvələrin formalaşdırılmasının vaxtı və üsulları ilə bağlıdır.