İsrailin Baş naziri Benyamin Netanyahu İranla münaqişə fonunda parlamentə növbədənkənar seçkilər keçirməyə qərar verə bilər. Məqsəd artan dəstəyindən istifadə etmək və payızda keçiriləcək səsvermədən qaçmaqdır".
“Operativ Məlumat Mərkəzi-OMM” xəbər verir ki, bununla bağlı "Al-Monitor" portalı mənbələrə istinadən məlumat yayıb.
Bildirilib ki, Netanyahu seçkilərin 7 oktyabr hücumlarının ildönümünə çox yaxın keçirilməsini istəmir:
"Bu halda seçki kampaniyası həmin hadisələrlə bağlı istintaq komissiyasının yaradılması məsələsi üzərində qurula bilər. Bir çox israilli belə komissiyanın yaradılmasını tələb edir. Aydındır ki, Netanyahu seçki kampaniyasını İranla müharibə zamanı əldə olunan nəticələr üzərində quracaq”.
Al-Monitor mənbələrinin sözlərinə görə, Netanyahu hazırda İrana edilən hücumların nəticəsindən siyasi fayda götürmək istəyir və əməliyyatın davamının İsrail üçün yeni uğurlar gətirməyə biləcəyindən ehtiyat edir.
Qeyd edək ki, mövcud qrafikə görə seçkilər 2026-cı ilin oktyabrında keçirilməlidir.
