Afət Ziyadqızı
Litva Prezidenti Gitanas Nauseda “X” sosial media platformasında bildirib ki, ölkənin hava məkanına daxil olan pilotsuz uçuş aparatı NATO-ya məxsus döyüş təyyarələri tərəfindən məhv edilib.
“Operativ Məlumat Mərkəzi-OMM” xəbər verir ki, bu barədə xarici mətbuat Litva dövlət başçısının bəyanatına istinadən məlumat yayıb.
Məlumata görə, çərşənbə axşamı səhər saatlarında paytaxt Vilnüs və ətrafında dron təhlükəsi ilə bağlı həyəcan siqnalları işə salınıb. Litvanın Milli Böhran İdarəetmə Mərkəzinin nümayəndəsi pua-nın mənşəyinin hələlik müəyyən edilmədiyini qeyd etsə də, Litva Müdafiə Nazirliyi ölkənin silahlı qüvvələri və NATO-nun hava müdafiəsi missiyasında xidmət edən italiyalı pilotların hava məkanı pozuntusuna operativ cavab verdiyini açıqlayıb. Nauseda Rusiyanın Ukraynaya təcavüzünü genişləndirdiyi bir vaxtda bu cür hazırlıq səviyyəsinin region üçün həyati əhəmiyyət daşıdığını vurğulayıb. Moskva hadisə ilə bağlı hələlik açıqlama verməyib.
Bildirilib ki, bazar günü də Litvada ehtimal ki, Belarus ərazisindən daxil olan dron müşahidə edilmişdi. Rusiyanın Ukraynaya müdaxiləsi fonunda Avropada pua tərəfindən hava məkanı pozuntuları kəskin artıb. Polşa da Ukrayna ərazisinə hücum edən Rusiya pua-ları ilə əlaqədar hava məkanında qabaqlayıcı aviasiya fəaliyyətinin aparıldığını açıqlayıb. Qeyd edək ki, NATO qırıcıları bu il Estoniya və Latviyada da istiqamətini itirmiş dronlara görə dəfələrlə havaya qaldırılıb.
