OMM Redaksiyası
“Murasu” siklonu çərşənbə axşamı Hindistanın şərq sahillərinə çatıb. Güclü küləklər minlərlə insanın təxliyəsinə səbəb olub. AnewZ yazır ki, bu, bölgəni bir həftə ərzində vuran ikinci ölümcül fırtınadır.
Hindistanın Meteorologiya Departamentinin (IMD) məlumatına görə, güclü siklon cənub-şərqdə yerləşən Andhra-Pradeş ştatında yerli vaxtla saat 03:30–05:30 arasında quruya çıxıb. Küləyin sürəti saatda 100–110 kilometrə, küləyin şiddətli həmlələri isə saatda 120 kilometrə çatıb.
Andhra-Pradeş Ştatının Fəlakətlərin İdarə Edilməsi İdarəsinin baş direktoru Prakhar Jain bildirib ki, ölən və ya xəsarət alanlar barədə məlumat yoxdur. Siklon ağacları və elektrik dirəklərini aşırıb.
Səlahiyyətlilər bazar ertəsi təxliyəyə başlayıb və siklonun birbaşa təsir zonasındakı Andhra-Pradeşdə təxminən 30 min nəfərin təhlükəsiz yerə köçürülməsini planlaşdırıb.
“Murasu” siklonu güclü tropik siklonların tez-tez baş verdiyi Benqal körfəzi üzərində formalaşıb. IMD Andhra-Pradeş və qonşu Tamil-Nadu ştatlarının fırtınanın əsas zərbəsini alacağını proqnozlaşdırıb.
“Murasu” bir həftə ərzində bölgəyə çatan ikinci siklondur. Ondan əvvəl baş verən “Arnab” siklonu azı altı nəfərin ölümünə səbəb olub.
“Arnab” çərşənbə günü Andhra-Pradeşdə quruya çıxıb və IMD tərəfindən çox güclü siklon kimi təsnif edilib.
