Serbiya Prezidenti Aleksandr Vuçiç Avropa İttifaqına (Aİ) üzv olmaq istəyən namizəd ölkələri yaxın gələcəkdə qurumun sürətli genişlənəcəyinə böyük ümid bağlamamağa çağırıb.
"Operativ Məlumat Mərkəzi-OMM" xəbər verir ki, bu barədə "Reuters" agentliyi məlumat yayıb.
Məlumata görə, Vuçiç Aİ-yə qoşulma prosesində hər hansı "möcüzə" gözləməyin real olmadığını bildirib. Serbiya lideri qeyd edib ki, genişlənmə məsələsində prosesin sürəti bir sıra siyasi və institusional amillərdən asılıdır.
Bununla yanaşı, Vuçiç Qərbi Balkan ölkələri, eləcə də Ukrayna, Moldova və Gürcüstan üçün Avropa inteqrasiyasının hələ də ən doğru istiqamət olduğunu vurğulayıb.
Hazırda Aİ-yə namizəd ölkələrin üzvlük prosesi fərqli templərlə davam edir. Monteneqro 2028-ci ilə qədər üzvlük prosesini başa çatdırmağı planlaşdırır, Albaniya isə Brüssellə danışıqları sürətləndirir. Serbiya, Şimali Makedoniya, Bosniya və Herseqovina, həmçinin Kosovo isə bu prosesdə daha yavaş irəliləyən ölkələr sırasında göstərilir.
Aİ daxilində də genişlənmə məsələsi ilə bağlı fərqli mövqelər mövcuddur. Macarıstanın Baş naziri Viktor Orban daha əvvəl Ukraynanın Aİ-yə üzvlüyü ilə bağlı danışıqların sürətləndirilməsinə qarşı çıxıb.
Orban bildirib ki, Ukraynanın üzvlük prosesinin ilkin mərhələsindən dərhal sonra digər məsələlərin müzakirəsinə başlanılması məntiqli deyil.
