İtaliyanın “Milan” klubu 24 yaşlı serbiyalı mərkəz müdafiəçisi Strahinja Pavloviçlə bağlı uzunmüddətli planlarını rəsmiləşdirməyə hazırlaşır.
"Operativ Məlumat Mərkəzi-OMM" xarici KİV-ə istinadən xəbər verir ki, “Rossoneri” rəhbərliyi futbolçunun 2028-ci ilə qədər olan müqaviləsini 2031-ci ilədək uzatmağı və bununla yanaşı əməkhaqqını artırmağı planlaşdırır.
Tərəflər arasında danışıqlar hazırda davam edir.
Məlumatlara görə, müqavilənin yenilənməsi həm də Premyer Liqa klublarından gələn maraq və son sorğuların qarşısını almaq məqsədi daşıyır. Qeyd olunur ki, ötən yay “Milan” Pavloviç üçün Almaniya klublarından birinin irəli sürdüyü 18 milyon avroluq təklifi geri çevirmişdi və indi serbiyalı futbolçunu uzun müddət komandada saxlamaq niyyətindədir.
Serbiya millisinin əsas üzvlərindən olan Pavloviç yığmada 52 oyun keçirib, 4 qol vurub. Cari A Seriyası mövsümündə isə müdafiəçi 18 oyunda meydana çıxıb, 2 qola və 1 məhsuldar ötürməyə imza atıb.
“Transfermarkt” portalının məlumatına əsasən, Strahinja Pavloviçin hazırkı bazar dəyəri 28 milyon avro təşkil edir.
“Milan” rəhbərliyi gənc, stabil və fiziki cəhətdən güclü müdafiəçini klubun gələcək əsas fiqurlarından biri kimi görür və bu səbəbdən müqavilə məsələsini tezliklə yekunlaşdırmaq istəyir.
