Afət Ziyadqızı
Argentina Futbol Federasiyası (AFA) oktyabrın 6-da Buenos-Ayresdə keçiriləcək Beninlə yoldaşlıq görüşü üçün milli komandanın heyətini açıqlayıb və 39 yaşlı ulduz futbolçu Lionel Messini də siyahıya daxil edib.
“Operativ Məlumat Mərkəzi-OMM” xəbər verir ki, bu barədə AFA-nın rəsmi mətbuat xidməti məlumat yayıb.
Məlumata görə, avqust ayında milli komandadakı zəngin karyerasını başa çatdırdığını elan edən Lionel Messi kapitanı olduğu kollektivlə son dəfə yaşıl meydançaya çıxacaq. Baş məşqçi Lionel Skaloni ilə aparılan məsləhətləşmələrdən sonra AFA rəhbərliyi dörd il əvvəl – 2022-ci ildə Qətərdə keçirilən dünya çempionatında qalib gəlmiş heyətin bütün üzvlərini bu matça dəvət edərək Messi üçün möhtəşəm vida mərasimi təşkil etmək qərarına gəlib.
Səkkiz qat “Qızıl top” mükafatçısı olan Messi Argentina yığmasının heyətində rekord göstəricilərə imza ataraq keçirdiyi 207 rəsmi oyunda 125 qol vurub. O, milli komanda ilə 2022-ci il Dünya Çempionatının, habelə 2021 və 2024-cü illərdə Amerika Kubokunun (Copa América) qalibi olub.
Bildirilib ki, Argentina millisi oktyabr ayındakı beynəlxalq fasilə çərçivəsində Beninlə yanaşı, Burkina Faso və Boliviya yığmaları ilə də yoldaşlıq görüşləri keçirəcək.
