OMM Redaksiyası
AnewZ-in məlumatına görə, Mərkəzi Asiya və Qafqazda bizneslərin inkişafına dəstək məqsədilə 500 milyon dollarlıq özəl investisiya fondu yaradılır. Özbəkistan digər beş qurumla birlikdə fondun təsisçi tərəfdaşıdır.
Mərkəzi Asiya və Qafqaz Özəl Sərmayə Fondu (CACPEF) “China Investment Corporation”, “Oman Investment Authority”, Özbəkistanın Yenidənqurma və İnkişaf Fondu (UFRD), Türkiyənin “OYAK” şirkəti, Avrasiya İnkişaf Bankı (EDB) və “Shenwan Hongyuan Securities” tərəfindən təsis olunur. Altı qurumun nümayəndələri Pekində keçirilən mərasimdə niyyət bəyannaməsi imzalayıblar.
Fond Mərkəzi Asiya və Qafqazda yüksək inkişaf potensialına malik şirkətlərə uzunmüddətli maliyyə, sahə üzrə ekspert dəstəyi və beynəlxalq biznes şəbəkələrinə çıxış təmin etməyi hədəfləyir. Logistika, bərpa olunan enerji, mədənçilik, qida və kənd təsərrüfatı, eləcə də səhiyyə prioritet sahələr sırasındadır. Təşəbbüs şirkətlərə yeni texnologiyaları tətbiq etməyə və beynəlxalq bazarlara çıxmağa da kömək etməyi nəzərdə tutur.
EDB-nin bildirdiyinə görə, regiondakı şirkətlər uzunmüddətli maliyyə çatışmazlığı ilə üzləşir və bu, onların genişlənmək, yeni bazarlara çıxmaq imkanlarını məhdudlaşdırır. Fond Çin, Yaxın Şərq və Mərkəzi Asiyadan olan iri investorları bir araya gətirməklə bu boşluğu aradan qaldırmağa çalışacaq.
Özbəkistanın Yenidənqurma və İnkişaf Fondu suveren inkişaf qurumudur. O, ölkədə iqtisadiyyatın yenidən qurulmasını, sənayenin modernləşdirilməsini və infrastrukturun inkişafını dəstəkləyir. Fondun təşəbbüsdə iştirakı Özbəkistanın beynəlxalq investisiyaların cəlb olunması və regional iqtisadi inkişaf səylərində rolunu gücləndirir.
EDB isə iştirakının üzv ölkələrin iqtisadiyyatlarına daha çox beynəlxalq kapital cəlb etməyə və region şirkətlərinin inkişafına kömək etmək məqsədi daşıdığını bildirib.
Təşəbbüs Oman ilə Mərkəzi Asiya arasında iqtisadi əlaqələrin genişlənməsini də əks etdirir. Oktyabrın 6-da Oman və EDB bankın Sultanlıqdakı fəaliyyətinin əsaslarını müəyyən edən saziş imzalayıblar. Saziş Oman üçün bankın səkkizinci səhmdarı və Körfəz regionundan ilk səhmdarı olmaq yolunu açır.
500 milyon dollarlıq fond Körfəz investorları ilə Mərkəzi Asiya iqtisadiyyatları arasında maliyyə əməkdaşlığının dərinləşdirilməsi istiqamətində növbəti addımdır. Təsisçi tərəfdaşlar hazırlıqları yekunlaşdırıb region şirkətlərinə investisiya qoyuluşuna başlamağa hazırlaşarkən, fonda başqa institusional investorların da qoşulacağı gözlənilir.
