Saffir-Simpson şkalası üzrə 3-cü kateqoriyaya qədər zəifləyən “Melissa” qasırğası oktyabrın 29-na keçən gecə Kubanın şərq hissəsinə çatıb.
"Operativ Məlumat Mərkəzi-OMM" xəbər verir ki, bu barədə "Cubadebate" xəbər portalı məlumat yayıb.
Məlumata görə, Santyaqo-de-Kuba əyalətinin Quam bələdiyyəsində küləyin sürəti saatda 195 km-ə çatıb.
Hakimiyyət təxminən 750 min sakini təhlükəsiz ərazilərə təxliyə edib. Qasırğanın xüsusilə şərqi Kubada infrastrukturda ciddi dağıntılara səbəb olacağı gözlənilir.
"Associated Press"in məlumatına görə, “Melissa” daha əvvəl Haiti, Yamayka və Dominikan Respublikasında azı 7 nəfərin ölümünə yol açıb.
Əvvəlcə 5-ci kateqoriyaya aid edilən qasırğa oktyabrın 28-də Yamaykaya çatarkən küləyin sürəti 295 km/saat-a yüksəlib və daşqınlara, genişmiqyaslı dağıntılara səbəb olub. Sonradan “Melissa” 4-cü, daha sonra isə 3-cü kateqoriyaya qədər zəifləyib.
Meteoroloqların proqnozuna görə, qasırğa Kubadan keçdikdən sonra Baham adalarına doğru irəliləyəcək.
