Afət Ziyadqızı
Demokratik Konqo Respublikasında (DKR) Ebola epidemiyası sürətlə genişlənməkdə davam edir. Beynəlxalq humanitar təşkilat "Médecins Sans Frontières" (MSF) vəziyyətin kritik həddə çatdığını bildirərək, xəstəliyə qarşı mübarizənin təcili şəkildə gücləndirilməsinə çağırış edib.
“Operativ Məlumat Mərkəzi-OMM” xəbər verir ki, rəsmi statistikaya əsasən, son beş həftə ərzində təsdiqlənmiş Ebola yoluxmalarının sayı üç dəfə artaraq 1926 nəfərə çatıb. Virus səbəbindən həyatını itirənlərin sayı isə 702 nəfərə yüksəlib.
MSF-in məlumatına görə, bu epidemiya tarixdə qeydə alınan üçüncü ən böyük və ən sürətlə yayılan Ebola epidemiyalarından biri hesab olunur. Təşkilat hazırda ölkədə yeddi Ebola müalicə mərkəzi və 15-dən çox izolyasiya bölməsini idarə edir.
Bildirilir ki, virusun yayılma coğrafiyası getdikcə genişlənir və xüsusilə ucqar yaşayış məntəqələrində tibbi xidmətlərə çıxışın məhdud olması vəziyyəti daha da ağırlaşdırır.
MSF-in Fövqəladə Proqramlar Meneceri Triş Nyuport bildirib ki, epidemiyanın qarşısının alınması istiqamətində görülən tədbirlər virusun yayılma sürətindən geri qalır. O, beynəlxalq ictimaiyyəti daha koordinasiyalı və operativ fəaliyyət göstərməyə çağırıb.
Qeyd edək ki, Bundibugyo ştammı ilə yayılan Ebola virusu yüksək hərarət, qusma və daxili qanaxma kimi ağır simptomlarla müşayiət olunur. Ümumdünya Səhiyyə Təşkilatı epidemiyanın hələ də genişlənmə mərhələsində olduğunu açıqlayıb və buna əhalinin miqrasiyası ilə müalicədəki gecikmələrin təsir göstərdiyini bildirib. ABŞ administrasiyası isə Demokratik Konqo Respublikasındakı vətəndaşlarının kommersiya reysləri ilə ölkəni tərk etməsinə məhdudiyyət tətbiq edib.
