"Penaltinin verilməməsi mənə təəccüblü gəldi. Marko Yankoviç futbolçumuzu dirsəklə vurduğuna görə qırmızı vərəqə almalı idi. Meydanda çox dayanma oldu. Ancaq baş hakim oyuna az vaxt əlavə etdi".
"Operativ Məlumat Mərkəzi-OMM" xəbər verir ki, bu sözləri UEFA Avropa Liqasının qrup mərhələsində evdə "Qarabağ"a 0:1 uduzan İsveçin "Hekken" klubunun baş məşqçisi Per-Matias Höqmo oyundan sonra keçirilən mətbuat konfransında deyib.
Norveçli mütəxəssis Ağdam klubunun yaxşı futbolçulara sahib olduöunu bildirib: "İlk hissədə oyunumuz alınırdı. Ancaq tədricən "Qarabağ"ın futbolçularının təcrübəsi özünü göstərməyə başladı. Kevin Medina və Mateus Silva xüsusən bizim oyunçulara qol vurmağa imkan vermədi. Hücumçumuz Edvard Çilufyanın 2 qol epizodu oldu. Ancaq belə oyunda ondan yararlanmalısan, əks halda bir də əlinə düşməyə bilər".
Hoqmo 2016-cı ildə Norveç millisini çalışdırarkən Bakıda millimizə 0:1 uduzmalarından da danışıb: "Azərbaycan futboluna böyük hörmətim var. Yaxşı müdafiə olunmağı bacarırlar. O vaxt Norveç millisində işləyərkən Azərbaycana uduzmasaydıq, qrupda digər komandalara da qalib gələrdik".
