İngiltərənin "Mançester Yunayted" klubu heyətini gücləndirmək istiqamətində transfer çalışmalarını davam etdirir. Bu dəfə klubun diqqət mərkəzində "Nyukasl"ın 21 yaşlı sol cinah müdafiəçisi Lyuis Holl yer alıb.
"Operativ Məlumat Mərkəzi-OMM" tanınmış insayder Fabritsio Romanoya istinadən xəbər verir ki,"Mançester Yunayted" rəsmiləri artıq futbolçunun nümayəndələri ilə ilkin müzakirələrə start veriblər.
Mançester təmsilçisinin gənc oyunçuya olan marağının ciddi olduğu və klubun onun potensialını yüksək qiymətləndirdiyi bildirilir.
"Çelsi" akademiyasının yetirməsi olan Lyuis Holl ötən mövsüm Eddi Haunun rəhbərliyi altında "Nyukasl"ın heyətində bütün turnirlər daxil olmaqla 47 qarşılaşmada meydana çıxıb.
O, bu oyunlarda 1 qol və 2 məhsuldar ötürmə ilə yadda qalıb. "Transfermarkt" portalının qiymətləndirməsinə əsasən, müdafiəçinin hazırkı bazar dəyəri 40 milyon avro təşkil edir.
