“Mançester Yunayted” 2026/27 mövsümündə Avropanın beş aparıcı liqasının klubları arasında bütün turnirlərdə ən çox qol buraxan komandadır.
Noyabrın 22-də Mançester təmsilçisi İngiltərə Premyer Liqasının 11-ci turunda “Liverpul”a 0:4 hesabı ilə uduzub. Bu görüşdən sonra “Mançester Yunayted”in bütün turnirlərdə buraxdığı qolların sayı 16 matçda 34-ə çatıb.
Bu, İngiltərə, İspaniya, İtaliya, Almaniya və Fransa çempionatlarında mübarizə aparan 96 komanda arasında ən zəif göstəricidir. “Mançester Yunayted” Premyer Liqanın turnir cədvəlində 11 oyundan topladığı 8 xalla 19-cu pillədə qərarlaşıb.